ހުވަދުއަތޮޅު އުތުރުބުރީ އަތޮޅު ކައުންސިލްގެ މެންބަރުންނާ މިނިސްޓަރ އޮފް ސިޓީސް ލޯކަލް ގަވަރމަންޓް އެންޑް ޕަބްލިކް ވަރކްސް އޮނަރަބްލް އާދަމް ޝަރީފު ޢުމަރު ބައްދަލްކުރައްވައިފިއެވެ. މި ބައްދަލުވުން އޮތީ އިއްޔެ މިނިސްޓްރީގައެވެ.

މި ބައްދަލުވުމުގައި އަތޮޅުގެ ރަށްރަށުގެ ކައުންސިލް އިދާރާތައް ޢިމާރާތްކުރުމާ ބެހޭ ގޮތުންނާއި، އަތޮޅު ފިހާރަތަކުގެ ކުލީގެ ފައިސާއާ ބެހޭ ގޮތުންނާއި، ފިނޭންސް މިނިސްޓްރީން ބަޖެޓް ދޫކުރުމުގައި ހުރި ދަތިތަކާ ގުޅޭ ގޮތުން މަޝްވަރާކުރެވިފައި ވެއެވެ. މީގެ އިތުރުން މި ބައްދަލުވުމުގައި އަތޮޅުގެ ބައެއް ރަށްރަށުގެ ކަރަންޓް ޚަރަދު ބޮޑުވާ މައްސަލައާއި، ބައެއް ރަށްރަށުގެ ޞިއްޙީ މަރުކަޒުތަކަށް ބޭނުންވާ ވަޞީލަތްތަކާ ބެހޭ ގޮތުންނާއި، ރަށްރަށުގެ ކުޅިވަރު ދަނޑުތަކުގައި ލައިޓުޖެހުމުގެ އިތުރުން ބައެއް ރަށްރަށުގެ ނަރުދަމާ ނިޒާމު ރަނގަޅުކުރުމާ ބެހޭ ގޮތުން ވެސް މަޝްވަރާކުރެވިފައި ވެއެވެ. 

މި ބައްދަލުވުމުގައި އެލްޖީ ޑިޕާޓްމެންޓުގެ ފަރާތުން ސްޓޭޓް މިނިސްޓަރ އަޙްމަދު ސާލިމާއި، ގއ. އަތޮޅު ހިމެނޭ ކުލަސްޓަރ ވިލަރެސްކޮށް ބަލަހައްޓަވައި ސްޓޭޓް މިނިސްޓަރ ޠާހާ ނަޢީމް މިނިސްޓަރގެ އަރިހުގައި ބައިވެރިވެވަޑައިގެންނެވިއެވެ.