މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސް އާދަމް ޝަރީފު ޢުމަރު އައްޑޫ ސިޓީ ކައުންސިލްގެ މެންބަރުންނާ ބައްދަލުކުރައްވައިފިއެވެ. މިއަދު މެންދުރުފަހު މިނިސްޓްރީގައި ބޭއްވި މި ބައްދަލުވުމުގައި އެ ސިޓީގެ މުހިންމު ކަންތައްތަކަކާ ބެހޭ ގޮތުން މަޝްވަރާކުރެވިފައި ވެއެވެ. 

އެ ގޮތުން މި އަހަރު އައްޑޫ ސިޓީގައި ސަރުކާރުން ހިންގުމަށް ހަމަޖެހިފައިވާ ތަރައްޤީގެ މަޝްރޫޢުތަކުގެ މަސައްކަތް އަވަސްކުރުމާ ބެހޭ ގޮތުން މަޝްވަރާކުރެއްވުމުގެ އިތުރުން އައްޑޫ ސިޓީގައި އަސާސީ ޚިދުމަތްތައް ފޯރުކޮށްދިނުމުގައި ސިޓީ ކައުންސިލަށް ދިމާވާ ދަތިތަކާ ބެހޭ ގޮތުންނާއި، އައްޑޫ ސިޓީގައި ހުރި މިނިސްޓްރީގެ ޕަބްލިކް ވަރކްސް ޔުނިޓްތަކުގެ މަސައްކަތްތަކާ ބެހޭ ގޮތުން މަޝްވަރާކުރެވިފައި ވެއެވެ. އަދި އައްޑޫ ސިޓީ ކައުންސިލްގެ މަސައްކަތްތަކާ ބެހޭ ގޮތުން މި ބައްދަލުވުމުގައި މަޝްވަރާކުރެވުނެވެ.

އައްޑޫ ސިޓީއާއެކު މިނިސްޓަރ ބޭއްވި މި ބައްދަލުވުމުގައި މިނިސްޓަރުގެ އަރިހުގައި ސްޓޭޓް މިނިސްޓަރ އަޙްމަދު ސާލިމާއި، ޑެޕިޔުޓީ މިނިސްޓަރ އަޙްމަދު ފައިޞަލް ބައިވެރިވެލެއްވިއެވެ.