މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސް އާދަމް ޝަރީފު ޢުމަރު މާޅޮސްމަޑުލު އުތުރުބުރީ އުނގޫފާރު ކައުންސިލާ ބައްދަލުކުރައްވައިފިއެވެ. މިއަދު މެންދުރުފަހު މިނިސްޓްރީގައި ބޭއްވި މި ބައްދަލުވުމުގައި މުހިންމު ކަންތައްތަކަކާ ބެހޭ ގޮތުން މަޝްވަރާކުރެވިފައި ވެއެވެ. 

އެ ގޮތުން އުނގޫފާރު އަރބަން ސެންޓަރެއްގެ ގޮތުގައި ތަރައްޤީ ކުރުމުގެ މަސައްކަތާއި، އުނގޫފާރުން އަލަށް ގޯތި ދޫކުރި ސަރަޙައްދުގައި ފެނާއި، ނަރުދަމާގެ ނިޒާމު ޤާއިމްކުރުމުގެ މަސައްކަތާއި، އެ ރަށުގެ  ކުނިކޮށި އަޕްގްރޭޑްކުރުމުގެ މަސައްކަތާ ބެހޭ ގޮތުން މަޝްވަރާކުރެވުނެވެ.  މީގެ އިތުރުން ބަނދަރުގެ ނެރު ތިލަވުމުގެ މައްސަލައަށް ޙައްލު ހޯދުމާ ގުޅޭ ގޮތުން ވެސް މި ބައްދަލުވުމުގައި މަޝްވަރާކުރެވުނެވެ. 

އުނގޫފާރު ކައުންސިލާ ބައްދަލުކުރުމަށް މިނިސްޓަރ ބޭއްވި މި ބައްދަލުވުމުގައި މިނިސްޓަރުގެ އަރިހުގައި ސްޓޭޓް މިނިސްޓަރ އަޙްމަދު ސާލިމާއި، ޑެޕިޔުޓީ މިނިސްޓަރ ސިމަން ހާދީ ބައިވެރިވެލެއްވިއެވެ.