20 އޯގަސްޓު 2025
އަތޮޅު ކައުންސިލުތައް އުވާލުމަށް ޤާނޫނަށް އިޞްލާޙު ގެންނަން ހުށަހަޅުއްވާނެ ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ އަރިއަތޮޅު އުތުރުބުރިއަށް މިހާރު ކުރައްވަމުންދާ ދަތުރުފުޅުގައި މަތިވެރިއަށް ވަޑައިގެން މަތިވެރީގެ ރައްޔިތުންނާ ބައްދަލުކުރެއްވުމަށް ރޭ މަތިވެރީގައި ބޭއްވި ބައްދަލުވުމުގައި ވާހަކަފުޅުދައްކަވަމުންނެވެ.
މަތިވެރީގައި ރޭ ބޭއްވި ބައްދަލުވުމުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވީ އަތޮޅު ކައުންސިލުތަކަކީ ބޭނުމެއް ނެތް ކައުންސިލުތަކެއް ކަމަށް ވާތީ، ޤާނޫނުއަސާސީއަށް އިޞްލާޙު ގެންނަން ރައްޔިތުންގެ މަޖިލީހަށް ހުށަހަޅުއްވާނެ ކަމަށެވެ. އަދި އޭގެ އިތުރަށް ވެސް ބައެއް އިޞްލާޙުތައް މަޖިލީހަށް ހުށަހަޅުއްވާނެ ކަމަށް އެ މަނިކުފާނު ވިދާޅުވިއެވެ. އޭގެ ތެރޭގައި ކައުންސިލްތަކުގެ ސައިޒު ކުޑަކުރުމުގެ އިޞްލާޙު ވެސް ހިމެނޭ ކަމަށް ރައީސް ވިދާޅުވިއެވެ.
"މިހާރު އަޅުގަނޑުމެން މި ހުށަހަޅައި އިޞްލާޙަކީ 2000 މީހުންނަށް ވުރެ އާބާދީ ކުޑަ ރަށްތަކުގައި ދެން އޮންނާނީ ތިން މީހުންގެ މައްޗަށް އެކުލެވޭ ކައުންސިލުތަކުގެ ގޮތުގައި. 2000 މީހުންނަށް ވުރެ ބޮޑެތި ރަށްރަށުގައި ފަސް ކައުންސިލަރުން ތިބޭނެ. ނަމަވެސް ސިޓީ ކައުންސިލުތަކަށް މިއެއް އެޕްލައިއެއް ނުވާނެ. ސިޓީ ކައުންސިލުތަކަށް ގާތްގަނޑަކަށް މިހާރު އޮތް ނިޒާމު އޮންނާނީ، ބައެއް ސިޓީތަކަށް ކުދިކުދި ބަދަލު އަތުވެދާނެ." ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ ކައުންސިލްތަކުން ރައްޔިތުންނަށް ކޮށްދޭން ބޭނުންވާ ކަންކަމަށް މި ސަރުކާރުން ހުރަހެއް ނާޅާނެ ކަމަށާއި، ސަރުކާރުން ބޭނުންވާ ކަމަކީ ޒިންމާދާރު ކުރުވާ ނިޒާމެއް ގާއިމްކޮށް، ޗެކް އެންޑް ބެލެންސް ވަރުގަދަ ކުރުން ކަމަށެވެ. އަދި ކައުންސިލަކުން ރައްޔިތުންނަށް ކަންކަން ކޮށްދޭން ބޭނުންވާ ބާރު މިނުގައި ކައުންސިލްގެ އަތުގައި ހިފައިގެން މި ސަރުކާރުން ކުރިއަށް ދާނެ ކަމަށް ވެސް އެ މަނިކުފާނު ވިދާޅުވިއެވެ.
މަތިވެރީގައި ބޭއްވި ބައްދަލުވުމުގައި ރައީސުލްޖުމްހޫރިއްޔާ ވިދާޅުވީ ސަރުކާރުން މަސައްކަތްކުރާނީ އިޚްލާޞްތެރިކަމާއެކު ރައްޔިތުންގެ ފަޅީގައި އޮވެގެން ކަމަށެވެ. އިޞްލާޙުތައް ގެންނަނީ ދެފުށްފެންނަ ގޮތަށް ކަންކަން ބަލައި، އިތުރަށް ޒިންމާދާރުކުރުވުމަށް ކަމަށް ރައީސުލްޖުމްހޫރިއްޔާ ވިދާޅުވިއެވެ.
