20 އޯގަސްޓު 2025
ލާމަރުކަޒީ ނިޒާމު ހަރުދަނާކުރުމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު އުފެއްދެވި މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސްއަށް އއ. ބޮޑުފޮޅުދޫ ކައުންސިލްގެ ރައީސް ޝުޖާޢު އާދަމް ތަޢުރީފު ކުރައްވައިފިއެވެ.
ބޮޑުފުޅަދޫ ކައުންސިލްގެ ރައީސް ޝުޖާޢު އާދަމް މި ގޮތަށް ތަޢުރީފުކުރެއްވީ ރައީސުލްޖުމްހޫރިއްޔާ އަރިއަތޮޅު އުތުރުބުރިއަށް މިހާރުކުރައްވަމުންދާ ދަތުރުފުޅުގައި ބޮޑުފުޅަދުއަށް ވަޑައިގެން ބޮޑުފުޅަދޫ ރައްޔިތުންނާ ބައްދަލުކުރުމަށް ބޭއްވި ބައްދަލުވުމުގައި ޝުޖާޢު އާދަމް ދެއްކެވިވާހަކަފުޅުގައެވެ.
"ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމަށް ވަޑައިގެން ފުރަތަމަ ކައުންސިލްތަކަށް ޚާއްޞަ މިނިސްޓްރީއެއް އުފައްދަވައި، ކުރިއަށް ގެންދެވުމީ އަޅުގަނޑުމެންނަށް ލިބިގެންދިޔަ ވަރަށް ބޮޑު ކުރިއެރުމެއްގެ ގޮތުގައި އަޅުގަނޑު ފާހަގަކޮށް ރައީސުލްޖުމްހޫރިއްޔާއަށް ވަރަށް ޚާއްޞަ ޝުކުރެއް އެ ކަމަށް ޓަކައި ދަންނަވަން" ބޮޑުފޮޅުދޫ ކައުންސިލްގެ ރައީސް ވިދާޅުވިއެވެ.
ބޮޑުފުޅަދޫ ކައުންސިލްގެ ރައީސް ޝުޖާޢު އާދަމް ދެއްކެވިވާހަކަފުޅުގައި ހަފުތާގެ ހަތްދުވަހު 24 ގަޑިއިރު ސިޓީސް، މިނިސްޓްރީން ކައުންސިލްތަކާއެކު މަސައްކަތްކުރައްވާ ކަމަށް ވިދާޅުވިއެވެ. އެ ކަމަށް ޓަކައި ޝުޖާޢު އާދަމް ވަނީ މިނިސްޓަރ އާދަމް ޝަރީފު ޢުމަރަށާއި، މިނިސްޓަރުގެ ޓީމަށް އިޚްލާޞްތެރިކަމާއެކު ޝުކުރު އަދާކުރައްވާފައެވެ.
ރައީސުލްޖުމްހޫރިއްޔާ ބޮޑުފުޅަދޫ ރައްޔިތުންނާ ބައްދަލުކުރުމަށް މިއަދު ބޭއްވި މި ބައްދަލުވުމުގައި ޝޫޖާޢު އާދަމް ދެއްކެވިވާހަކަފުޅުގައި ކޮންމެ އަތޮޅެއްގައި ޕަބްލިކް ވަރކްސް ޔުނިޓެއް ޤާއިމުކުރުމަށް މަސައްކަތްކުރެއްވުމަކީ ވެސް ލާމަރުކަޒީ ނިޒާމު ފައްކާވަމުން އަންނަކަމުގެ ދަލީލެއް ކަމަށް ވިދާޅުވެ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒަށް ޚާއްޞަ ޝުކުރެއްއަދާކުރެއްވިއެވެ.
