news photo

ހިތްވަރު ދިނުމުގެ ޤައުމީ އިނާމު ޙާޞިލުކުރެއްވި ޑެޕިއުޓީ މިނިސްޓަރ އަޙުމަދު ވަޙީދު ޢަލީއަށް ތަހުނިޔާ ވިދާޅުވެއްޖެ

24 އޯގަސްޓު 2025

އިޖުތިމާޢީ ޚިދުމަތުގެ ދާއިރާއިން ޖަމާޢަތަށް ފައިދާހުރި މަސައްކަތްތައް ކުރުމުގެ ރޮނގުން ހިތްވަރު ދިނުމުގެ ޤައުމީ އިނާމު ޙާޞިލު ކުރެއްވި މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސްގެ ޑެޕިއުޓީ މިނިސްޓަރ އަލްފާޟިލް އަޙުމަދު ވަޙީދު ޢަލީއަށް މިނިސްޓްރީގެ މުވައްޒަފުންނާއި މިނިސްޓަރގެ ނަންފުޅުގައި، މިނިސްޓަރ އާދަމް ޝަރީފު ޢުމަރު ތަހުނިޔާ ވިދާޅުވެއްޖެއެވެ.

މިނިސްޓްރީގެ ޑެޕިއުޓީ މިނިސްޓަރކަމުގައި ހުންނެވި އަލްފާޟިލް އަޙުމަދު ވަޙީދު ޢަލީއަށް ހިތްވަރު ދިނުމުގެ ޤައުމީ އިނާމު ދެއްވާފައިވަނީ ސަރުކާރުން މިއަހަރުގެ ޤައުމީ ދުވަހުގެ މުނާސަބަތުގައި ހއ. އުތީމުގައި މިއަދު ބޭއްވި ރަސްމީ ޖަލްސާގައި، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒެވެ.
އަޙުމަދު ވަޙީދު ޢަލީއަކީ 1988 ވަނަ އަހަރުންފެށިގެން ތަޢުލީމީ ދާއިރާގައި 36 އަހަރަށްވުރެ ގިނަދުވަހު ޚިދުމަތްކުރައްވާފައިވާ ޚިދުމަތްތެރިއެކެވެ. ތަޢުލީމީ ދާއިރާގެ އިތުރުން އިޖުތިމާޢީ ގޮތުން އެކި ރޮނގުރޮނގުން ވަޙީދު ވަނީ ރަށާއި އަތޮޅަށް އަދި ދިވެހި ޤައުމަށް ގިނަގުނަ ޚިދުމަތްތަކެއް ކޮށްދެއްވާފައެވެ.

އިޖުތިމާޢީ ޚިދުމަތުގެ ދާއިރާއިން ޖަމާޢަތަށް ފައިދާހުރި މަސައްކަތްތައް ކުރުމުގެ ރޮނގުން ހިތްވަރު ދިނުމުގެ ޤައުމީ އިނާމު ޙާޞިލުކުރެއްވުމާ ގުޅިގެން މިނިސްޓަރ އާދަމް ޝަރީފު ޢުމަރު 'އެކްސް' ގައި ކުރެއްވި ޕޯސްޓެއްގައި ވަނީ އަޙްމަދު ވަޙީދު ޢަލީއަށް އިތުރު ކާމިޔާބަށް އެދިވަޑައިގަންނަވާކަން ހާމަކުރައްވާފައެވެ.