25 އޯގަސްޓު 2025
ހަނިމާދޫއަށް ހިޖުރަކުރާ ހިރިމަރަދޫ ރައްޔިތުންނަށް ޚާއްޞަ ބޯހިޔާވަހިކަމާއި، މުނިސިޕަލް ޚިދުމަތްތައް ޤާއިމުކުރުމުގެ މަޝްރޫޢަކީ، ހިރިމަރަދޫ ރައްޔިތުންގެ ކުރިމަގު އުޖާލާވާނެކަމެއް ކަމަށް މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސް އާދަމް ޝަރީފު ޢުމަރު ވިދާޅުވެއްޖެއެވެ.
ކުރެއްވި އެކްސް ޕޯށްޓެއްގައި މިނިސްޓަރ ވިދާޅުވީ ހަނިމާދޫއަށް ހިރިމަރަދޫން ހިޖުރަކުރާ ރައްޔިތުންނަށް ޚާއްޞަ ބޯހިޔާވަހިކަމުގެ މަޝްރޫޢެއް ހިންގުމާއި މުނިސިޕަލް ޚިދުމަތްތައް ޤާއިމުކުރުމުގެ މަޝްރޫޢުގެ އެއްބަސްވުމުގައި ސޮއި ކުރުމަކީ ހިރިމަރަދޫ ރައްޔިތުންގެ ކުރިމަގު އުޖާލާވާނެކަމެއް ކަމަށެވެ. އަދި އެއީ އުންމީދީ ފެށުމެއް. ކަމަށެވެ.
"ދޮޅު އަހަރު ދުވަހުގެ ތެރޭގައި ހިރިމަރަދޫގެ ލޮބުވެތި ރައްޔިތުން ހަނިމާދޫއަށް ބަދަލުވެ، އާބާދުވުމަކީ ހިރިމަރަދޫ ރައްޔިތުން ވަރަށް އިންތިޒާރުކުރާ ކަމެއް" މިނިސްޓަރ އާދަމް ޝަރީފު ޢުމަރު ވިދާޅުވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއްޔެ މެންދުރު ފަހު ހދ. އަތޮޅުގެ ރަށްތަކަށް ފެއްޓެވި ދަތުރުފުޅުގައި ހިރިމަރަދޫއަށް ވަޑައިގެން ހިރިމަރަސދޫ ރައްޔިތުންނާ ބައްދަލުކުރައްވާ ދެއްކެވިވާހަކަފުޅުގައި ގޯއްޗަކަށް ގޯއްޗެއް ލިބޭގޮތަށް 18 މަސްދުވަސްތެރޭ އެ ރަށުގެ ރައްޔިތުން ހަނިމާދޫއަށް ބަދަލުކޮށް، އަޅައިދޭ ގޯތީގެ ތަޅުދަނޑި ހަވާލުކުރައްވާނެ ކަމަށް ވަނީ ވިދާޅުވެފައެވެ. ރައީސް ވިދާޅުވީ ހިޖުރަކުރާ ފަރާތްތަކަށް ފައިސާގެ ބަދަލެއްވެސް ދެއްވާނެކަމަށެވެ. އަދި ސަރުކާރުން ބޭނުންވަނީ ހިރިމަރަދޫގެ ރައްޔިތުންގެ މުސްތަޤްބަލު އުޖާލާކޮށްދީ، ހުރިހާ ރައްޔިތުންނަށް މަތީ ފަންތީގެ ޚިދުމަތް ހޯދައިދީ، އުންމީދުގައި ކުލަ ޖައްސައިދިނުން ކަމަށް އެ މަނިކުފާނު ވިދާޅުވިއެވެ.
