25 އޯގަސްޓު 2025
ހިރިމަރަދޫ ރައްޔިތުންނަށް ކޮންމެ ގޯއްޗަކަށް، ގޯއްޗެއް ދެއްވާނެ ކަމަށް ރައީސުލްޖުމްހޫރިއްޔާ ވިދާޅުވެއްޖެއެވެ. ރައީސުލްޖުމްހޫރިއްޔާ ދރ. މުޙައްމަދު މުޢިއްޒު މިހެން ވިދާޅުވީ އިއްޔެ ހަވީރު ހިރިމަރަދޫ ރައްޔިތުންނާ ބައްދަލުކުރެއްވުމަށް އެ ރަށުގައި ބޭއްވި ބައްދަލުވުމުގައި ރައްޔިތުންނާ މުޚާޠަބުކުރައްވާ ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ވިދާޅުވީ ހދ. ހިރިމަރަދޫ ރައްޔިތުންނަށް ހަނިމާދޫއިން ދާއިމީ ބޯހިޔާވަހިކަން ހޯއްދަވައިދެއްވާ އިރު، ކޮންމެ ގޯއްޗަކަށް ގޯއްޗެއްދެއްވައި، ދޮޅު އަހަރުގެ ތެރޭގައި އެ ގޯތީގައި ގެއެއް އަޅުއްވައި ނިންމާނެކަމަށޭވެ.
އިއްޔެ ހިރިމަރަދޫގައި އޮތް މި ބައްދަލުވުމުގައި ހަނިމާދޫއަށް ހިރިމަރަދޫން ހިޖުރަކުރާ ރައްޔިތުންނަށް ޚާއްޞަކުރެވިފައިވާ ސަރަޙައްދުގައި ބޯހިޔާވަހިކަމުގެ މަޝްރޫޢު ހިންގެވުމާއި، މުނިސިޕަލް ހިދުމަތްތައް ގާއިމްކުރެއްވުމުގެ ފްރޭމްވަރކް އެއްބަސްވުމުގައި މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރއާއި، ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑާއި ދެމެދު ވަނީ ސޮއިކުރައްވާފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއްޔެ މެންދުރު ފަހު ހދ. އަތޮޅުގެ ރަށްތަކަށް ފެއްޓެވި ދަތުރުފުޅުގައި ހިރިމަރަދޫއަށް ވަޑައިގެން ހިރިމަރަސދޫ ރައްޔިތުންނާ ބައްދަލުކުރައްވާ ދެއްކެވިވާހަކަފުޅުގައި ގޯއްޗަކަށް ގޯއްޗެއް ލިބޭގޮތަށް 18 މަސްދުވަސްތެރޭ އެ ރަށުގެ ރައްޔިތުން ހަނިމާދޫއަށް ބަދަލުކޮށް، އަޅައިދޭ ގޯތީގެ ތަޅުދަނޑި ހަވާލުކުރައްވާނެ ކަމަށް ވަނީ ވިދާޅުވެފައެވެ. ރައީސް ވިދާޅުވީ ހިޖުރަކުރާ ފަރާތްތަކަށް ފައިސާގެ ބަދަލެއްވެސް ދެއްވާނެކަމަށެވެ. އަދި ސަރުކާރުން ބޭނުންވަނީ ހިރިމަރަދޫގެ ރައްޔިތުންނަށް މުސްތަޤްބަލު އުޖާލާކޮށްދީ، ހުރިހާ ރައްޔިތުންނަށް މަތީ ފަންތީގެ ޚިދުމަތް ހޯދައިދީ، އުންމީދުގައި ކުލަ ޖައްސައިދިނުން ކަމަށް އެ މަނިކުފާނު ވިދާޅުވިއެވެ.
ހިރިމަރަދޫ ރައްޔިތުންނާ ބައްދަލުކުރައްވާ ރައީސްދެއްކެވިވާހަކަފުޅުގައި ހިރިމަރަދޫ ރައްޔިތުން ހަނިމާދޫއަށް ބަދަލުވާން ހޭދަވާ ދޮޅުއަހަރުގެ ތެރޭގައި ވެސް ރައްޔިތުންގެ ކުރިއެރުމަށް ބޭނުންވާ ކަންކަން ފަހިކޮށްދީ ރައްޔިތުން ބޭނުންވާ ކަންކަމުގައި ސަރުކާރުން އެއްބާރުލުން ދެއްވާނެކަމުގެ ޔަގީންކަން ދެއްވިއެވެ.
