ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޒަޢާމަތުގައި އެކުލަވައިލެއްވި ވަޒީރުންގެ މަޖިލީހުގެ މިނިސްޓަރ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވަރކްސްގެ މަޤާމަށް އޮނަރަބްލް އާދަމް ޝަރީފު ޢުމަރު އައްޔަން ކުރެއްވީ 17 ނޮވެންބަރު 2023 ވަނަ ދުވަހުއެވެ.

އޮނަރަބްލް އާދަމް ޝަރީފު ޢުމަރަކީ މާޅޮސްމަޑުލު އުތުރުބުރީ ފައިނަށް އުފަން ބޭފުޅެކެވެ. ދިވެހި ދައުލަތަށް ގިނަ ދުވަހު ޚިދުމަތް ކުރެއްވުމުގެ ޤައުމީ އިނާމު 2021 ވަނަ އަހަރު ޙާޞިލު ކުރައްވާފައިވާ އާދަމް ޝަރީފު ޢުމަރު ވަނީ މެލޭޝިއާއާއި އިނގިރޭސި ވިލާތުން މަތީ ތަޢުލީމު ޙާޞިލު ކުރައްވާފައެވެ. މާސްޓަރސް ޙާޞިލު ކުރެއްވީ ޔުނިވަރސިޓީ އޮފް އީސްޓް އެންގްލިއާ އިންނެވެ. އަދި އޮސްޓްރޭލިއާ، ސައުތު އެފްރިކާ، ޗައިނާ، ތުރުކީ، މެކްސިކޯ، ހަވާއީ، ސަޢުދީ އަރަބިއާ، އިންޑިއާ އަދި ސްރީލަންކާއާއެކު ތަޢުލީމީ، އިޖުތިމާޢީ އަދި ސިޔާސީ ދާއިރާގެ މަސައްކަތުގެ ތަޖުރިބާ ހޯއްދަވާފައިވެއެވެ.

އޮނަރަބްލް އާދަމް ޝަރީފު ޢުމަރު ދިވެހި ޤައުމަށް ޚިދުމަތް ކުރައްވަން ފައްޓަވާފައިވަނީ އުމުރުން 17 އަހަރުގައި، 22 ފެބުރުއަރީ 1981 ގައެވެ. ޓީޗަރުކަމުން ފެށިގެން ލެކްޗަރާރކަމާއި ހަމައަށް ކިޔަވައިދެއްވުމުގައި މަސައްކަތް ކުރެއްވިއިރު، ހިންގުމުގެ ދާއިރާއިން މެނުއަލްތައް ލިޔުއްވައި، ހިންގުމުގެ ދާއިރާގައި މަސައްކަތް ކުރެއްވުމުގެ އިތުރުން، ތަޢުލީމީ މުއައްސަސާތަކުގެ އެންމެ އިސްވެރިއެއްގެގޮތުގައި މަސައްކަތް ކުރައްވާފައިވެއެވެ. އަދި ތަޢުލީމީ ކަންކަން ދިރާސާ ކުރައްވައި، އެ ދިރާސާތައް ހުށަހަޅުއްވާފައިވެއެވެ.

ރާއްޖޭގައި ޓީޗަރ ރިސޯސް ސެންޓަރތައް ޤާއިމު ކުރުމާއި ނޭޝަނަލް އިންސްޓިޓިއުޓް އޮފް އެޑިޔުކޭޝަން އުފެއްދުމާއި މުދައްރިސުންގެ ފެންވަރު މަތިކުރުމަށް ކޯސްތައް ހިންގުމާއި މުދައްރިސުންނަށް ބައިނަލްއަޤުވާމީ ކޮންފަރެންސްތައް ބޭއްވުމާއި މަދަރުސީ ތަޢުލީމުގެ ޤައުމީ މަންހަޖު ފަރުމާ ކުރުމުގައި ވަރަށް މުހިންމު ދައުރެއް އާދަމް ޝަރީފު ޢުމަރު އަދާކުރެއްވިއެވެ.

އޮނަރަބްލް އާދަމް ޝަރީފު ޢުމަރު ލިޔުއްވާފައިވާ ފޮތްތަކުގެ ތެރޭގައި ދަރިވަރުންގެ ފެންވަރު ވަޒަންކުރުން، ކްލާސްރޫމް އިންތިޒާމް ކުރުން އަދި މުދައްރިސުންގެ ފަންނީ އޮނިގަނޑު ހިމެނެއެވެ. މީގެއިތުރުން، ރާއްޖޭގެ މުދައްރިސުންގެ ތަޢުލީމުގެ ރިހިފޮތް، ސާސްކަފުގެ 17، ފަދަ ފޮތްތައް އެކުލަވާލުމުގައިވެސް އެމަނިކުފާނު ވަރަށް މުހިންމު ދައުރެއް އަދާކުރެއްވިއެވެ.

އޮނަރަބްލް އާދަމް ޝަރީފު ޢުމަރު ފުރަތަމަ އަދާކުރެއްވި ސިޔާސީ މަޤާމަކީ މިނިސްޓަރ އޮފް ސްޓޭޓް ފޮރ އެޑިޔުކޭޝަން އެވެ. އެއީ، 2014 ވަނަ އަހަރުއެވެ. އެ މަޤާމުގައި ހުންނަވަނިކޮށް، 28 އޮކްޓޫބަރ 2015 ވަނަ ދުވަހު ރާއްޖޭގެ ދިފާޢީ ވަޒީރުކަމަށް އައްޔަން ކުރެއްވިއެވެ. ރައީސް ޔާމީންގެ ރިޔާސީ ދައުރު ނިމެންދެން ހުންނެވީ އެ މަޤާމުގައެވެ.

ދިފާޢީ ވަޒީރު ކަމުގެ މަޤާމުގައި ހުންނަވައިގެން ކުރެއްވި ޚިދުމަތްތަކުގެތެރޭގައި ކޮލެޖް އޮފް ޑިފެންސް އެންޑް ސެކިއުރިޓީ ސްޓްޑީޒާއި ނޭޝަނަލް ކައުންޓަރ ޓެރަރިޒަމް ސެންޓަރާއި އިސްކަންދަރު އެއަރބޭސް ޤާއިމު ކުރުމާއި ނޮދަން އޭރިއާގެ ހެޑްކުއާޓާޒް ޅ.މާފިލާފުއްޓަށް ބަދަލުކުރުމާއި ސީ އެންބިއުލާންސްގެ ޚިދުމަތް ހަރުދަނާކުރުމާއި ކާރިސާތަކުގައި މީހުންނާއި މުދާ ސަލާމަތް ކުރުމަށް ބޭނުންވާނެ ވަސީލަތްތައް ހޯދުމުގައި އާދަމް ޝަރީފު ޢުމަރު ކުރެއްވި މަސައްކަތް ފާހަގަކޮށްލެވެއެވެ.

އޮނަރަބްލް އާދަމް ޝަރީފު ޢުމަރަކީ 19 ވަނަ ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރެވެ. ޕީޕަލްސް ނޭޝަނަލް ކޮންގްރެސްގެ ޕާލަމަންޓްރީ ގްރޫޕްގެ ލީޑަރެވެ. ރައްޔިތުންގެ މަޖިލީހުގައި ކުރެއްވި މަސައްކަތްތަކުގެތެރޭގައި ދިވެހިރާއްޖޭގެ ޤައުމީ ސަލާމަތާބެހޭ ބިލު މަޖިލީހަށް

ހުށަހެޅުއްވުމުގެ އިތުރުން ރައްޔިތުންނާ ގުޅުންހުރި 48 މައްސަލަ މަޖިޅީހަށް ހުށަހެޅުއްވިއެވެ. މީގެތެރޭގައި ޤަރާރާއި ކުއްލި މައްސަލައާއި މައްސަލައާއި ވަޒީރުންނާ ސުވާލު ކުރުން ހިމެނެއެވެ.

މިނިސްޓްރީ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވަރކްސްގެ މެންޑޭޓްގައިވާ މަސްއޫލިއްޔަތާއި ޒިންމާތައް އަދާކުރެއްވުމުގެ އިތުރުން އިތުރުން ލޯކަލް ގަރަންމަންޓް އޮތޯރިޓީ ބޯޑުގެ ރައީސަކީ ވެސް މިނިސްޓަރ އާދަމް ޝަރީފު ޢުމަރެވެ.