މަދަޙަ ކިޔުމަކީ ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَގެ ޙަޔާތްޕުޅުން ޢިބުރަތް ޙާސިލުކުރުމަށް ލިބޭ ފުރުސަތެއް ކަމަށް މިނިސްޓަރ އޮފް ސިޓީސް ލޯކަލް ގަވަރމަންޓް އެންޑް ޕަބްލިކް ވަރކްސް އާދަމް ޝަރީފު ޢުމަރު ވިދާޅުވެއްޖެއެވެ.

މިނިސްޓަރ މިހެން ވިދާޅުވީ ރަމަޝާން މަހަށް ޚާއްޞަކޮށްގެން މިނިސްޓްރީގެ ޑިޕާޓްމަންޓްތަކާއި، މުވައްޒަފުންގެ މެދުގައި ރޭ ކުރިއަށް ދިޔަ މަދަޙަ މުބާރާތް ޝަރަފުވެރި ކޮށްދެއްވައި ދެއްކެވި ވާހަކަފުޅުގައެވެ. 

އެ މަނިކުފާނު ވިދާޅުވީ ކުލަބު އެމްސީއެލްޕީން މަދަޙަ މުބާރާތެއް ބޭއްވުމަކީ މުވައްޒަފުންގެ މެދުގައި ގުޅުން ބަދަހިވުމުގެ އިތުރުން ހުނަރުތައް ދައްކާލުމަށް ލިބުނު ރަނުގެ ފުރުސަތެއް ކަމަށެވެ. އަދި މި ފަދަ މަދަޙަ މުބާރާތެއްގެ ސަބަބުން ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَގެ ހަނދާންތައް އާކުރުމާއި، އެކަލޭގެފާނުގެ ޒިކުރާވެސް އާވެގެންދާ ކަމަށް މިނިސްޓަރ ވިދާޅުވިއެވެ.

''މަދަޙަ ކިޔުމަކީ ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَގެ މައްޗަށް ތަޢުރީފުކުރުމާއި، ރަސޫލާގެ ޙަޔާތްޕުޅުން އަޅުގަނޑުމެންނަށް ދަސްވިކަންކަމާއި، ލިބިގަނެފައިވާ ޢިބުރަތްތަކާ މި ކަންކަމުގެ މައްޗަށް ރިޢާޔަތްކޮށް އަޅުގަނޑުމެން ކިޔަމުންދާ މަދަޙަ ނުވަތަ ޅެންބަހުން ހުށަހަޅާދޭ ހުށަހެޅުން'' މިނިސްޓަރ ވިދާޅުވިއެވެ.

މީގެ އިތުރުން މި މަދަޙަ މުބާރާތުގެ ފަނޑިޔާރުކަން ސިފައިންގެ ބޭކަލުން ކޮށްދެއްވާތީ މިނިސްޓަރ ވަނީ ޝުކުރު އަދާކުރައްވާފައެވެ. ފަނޑިޔާރުކަން ކޮށްދެއްވުމަށް ސިފައިންގެ ބޭކަލުން ވަޑައިގެންނެވުމަކީ ސިފައިންގެ ހުނަރުވެރިކަމާއި، ޤާބިލުކަން އަދި އެހީތެރިކަން ދިނުމަށް، ސިފައިން ތައްޔާރަށް ތިބިކަމުގެ ހެތްކެއް ކަމަށް މިނިސްޓަރ ވިދާޅުވިއެވެ.

''ރާއްޖޭގައި އެއްވެސް މުއައްސަސާއެއް އެއްވެސް ނިޒާމެއް އޭގެ ޒާތުގައި ފޭލްވާ ހިސާބަކަށް ގޮސްފިކަމަށްވާނަމަ އެ ނިޒާމެއް ނެގެހެއްޓުމުގެ ޤާބިލުކަން އެމްއެންޑީއެފްގައި އޮންނާނެ'' މިނިސްޓަރ ވިދާޅުވިއެވެ.

ރޭ މިނިސްޓްރީގެ ކުޅިވަރު ފެންޑާގައި ކުރިއަށް ދިޔަ މަދަޙަ މުބާރާތުގެ އެއް ވަނަ ހޯދި ޓީމަށާއި، އެއްވަނަ ހޯދި މަދަޙަ ކިޔުންތެރިޔާއަށް އިނާމާއި، ސެޓްފިކެޓް ހަވާލުކޮށްދެއްވީ މިނިސްޓަރ އާދަމް ޝަރީފު ޢުމަރުއެވެ.