16 މާރިޗު 2025
ވާރޭވެހި ފެންބޮޑުވުމުގެ ސަބަބުން މާލޭގައި ދިރިއުޅޭ ފަރާތްތަކަށް ދިމާވާ އުނދަގޫތައް ކުޑަކުރުމަށް ޓަކައި މި ހިނގާ މާރިޗުމަހުގެ 8 ވަނަ ދުވަހު، މި މިނިސްޓްރީން ފެށި މާލޭގެ ކާނުތައް ސާފުކުރުމުގެ މަސައްކަތް ބާރު ސްޕީޑުގައި ކުރިއަށް އެބަ ދެއެވެ.
ލަގްޒަރީ ކުރިމަތިން ފެށި މި މަސައްކަތް މިހާރު ވަނީ ޗާންދަނީމަގުގެ ހުޅަނގު، މަޖީދީމަގުގެ ދެ ފަޅީގައިވާ ކާނުތައް ސާފުކޮށް މުޅިން ނިމިފައެވެ. ކާނުތައް ސާފުކުރުމުގެ މަސައްކަތުގެ ތެރެއިން މާދަމާ ހެނދުނު ކުރިއަށް ދާނީ ޗާންދަނީމަގުގެ އިރުމަތި، މަޖީދީމަގުގެ ކާނުތައް ސާފުކުރުމުގެ މަސައްކަތް ކަމަށް އެ މަސައްކަތް ހިންގުމުގައި އިސްކޮށް ޙަރަކާތްތެރިވަމުން އަންނަ މި މިނިސްޓްރީގެ ސީނިއަރ ޕޮލިޓިކަލް ޑިރެކްޓަރ ޢަބްދުﷲ މުފީދު ވިދާޅުވިއެވެ.
ކާނުތައް ސާފުކުރުމުގެ މަސައްކަތް މި ރަމަޟާންމަހު ކުރަމުން އަންނަނީ ކޮންމެ ދުވަހެއްގެ ހެނދުނު 9.00 އިން މެންދުރު ފަހު 2.00 އަށެވެ. ކާނުތައް ސާފުކުރުމުގެ މަސައްކަތް މިހާރު ކުރިއަށް ގެންދާ ގޮތަށް، ކުރިއަށް ގެންގޮސް ނިންމާލުމުން ވާރޭވެހި މާލޭގައި ފެންބޮޑުވާ މައްސަލައަށް ކުޑަނަމަވެސް ޙައްލެއް ލިބިގެންދާނެ ކަމަށް ޤަބޫލުކުރެވެއެވެ.
މާލޭގެ ކާނުތައް ސާފުކުރުމުގެ މަސައްކަތަކީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ އިރުޝާދުގެ މަތިން ސީދާ މި މިނިސްޓްރީން ކުރިއަށް ގެންދާ ޙަރަކާތެކެވެ.