މިއަދަކީ ކުޑަކުދިންނަށް ވަރަށް އުފާވެރި ދުވަހެއް ކަމަށް މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވާރކްސް އާދަމް ޝަރީފު ޢުމަރު ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ ކުޑަކުދިންގެ ޕާކު ނެތް 12 ރަށެއްގައި ކުޑަކުދިންގެ ޕާކު ތަރައްޤީކުރުމުގެ އެއްބަސްވުމުގައި ސޮއިކުރުމަށް މިއަދު ހަވީރު ސްޓެލްކޯގެ 5 ވަނަ ފަންގިފިލާގެ އޮޑިޓޯރިއަމްގައި ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.  

މި ރަސްމިއްޔާތުގައި މިނިސްޓަރ ދެއްކެވި ވާހަކަފުޅުގައި ކުޑަކުދިންގެ ޕާކު ތަރައްޤީކުރެވޭ 12 ރަށުގެ އެންމެހައި ކުޑަކުދިންނަށާއި، އެ ރަށްތައް ހިމެނޭ ދާއިރާތަކުގެ ރައްޔިތުންގެ މަޖިލީހުގެ އެންމެހައި އެމްޕީނަށް  މަރުޙަބާ ދެންނެވިއެވެ. 

މިނިސްޓަރ ދެއްކެވި ވާހަކަފުޅުގައި މި ބަންދު ތެރޭގައި ވެސް މިނިސްޓްރީގެ އެންމެހައި މުވައްޒަފުން ކޮށްދެއްވަމުން އަންނަ މަސައްކަތްތަކަށް ޓަކައި މިނިސްޓަރ ފަޚްވެރިވާ ވާހަކަ ވިދާޅުވިއެވެ. އަދި އެ ކަމަށް ޓަކައި މިނިސްޓްރިގެ އެންމެހައި މުވައްޒަފުންނަށް އިޚްލާޞްތެރިކަމާއެކު ޝުކުރުއަދާކުރެއްވިއެވެ. 

މި ރަސްމިއްޔާތުގައި މިނިސްޓަރ އާދަމް ޝަރީފު ޢުމަރު ދެއްކެވި ވާހަކަފުޅުގައި، މިނިސްޓްރީގެ މަސައްކަތްތައް މިހާ ބާރު ސްޕީޑްގައި ކުރިއަށް ގެންދެވެނީ މިއަދުގެ ޢިއްޒަތްތެރި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އެ ކަންކަން ކުރިއަށް ގެންދަންވީ ގޮތާއި، ކަންކުރިއަށް ގެންދަންވީ ބާރު މިނާއި، ތާރީޚްތަކަށް ދާދެން ވިދާޅުވެ ދެއްވައި އެ މަސައްކަތް ޙަވާލުކުރައްވާތީ ކަމަށް ވިދާޅުވެ، ޢިއްޒަތްތެރި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒަށް ޝުކުރު ދެންނެވިއެވެ.  

ޕާކުތައް ތަރައްޤީކުރުމުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި  ޕާކުތައް ތަރައްޤީ ކުރުމަށް ހަމަޖެހިފައިވާ ރަށްތައް ހިމެނޭ ދާއިރާތަކުގެ ރައްޔިތުންގެ މަޖިލީހުގެ ޢިއްޒަތްތެރި މެންބަރުން ބައިވެރިވެ ވަޑައިގެންނެވިއެވެ. މިއަދު ސޮއިކުރެވުނު ކުޑަކުދިންގެ ޕާކުތައް ކުރިއަށް އޮތް 6 މަސްދުވަހުގެ ތެރޭ ނިންމުމަށް ވަނީ ހަމަޖެހިފައެވެ.