news photo

12 ރަށެއްގައި ކުޑަކުދިންގެ ޕާކު ތަރައްޤީކުރުމަށް ޙަވާލުކޮށްފި

29 މާރިޗު 2025

ކުޑަކުދިންގެ ޕާކު ނެތް 12 ރަށެއްގައި ކުޑަކުދިންގެ ޕާކު ތަރައްޤީކުރުމުގެ މަސައްކަތް މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވާރކްސްއިން މިއަދު ޙަވާލުކޮށްފިއެވެ. 

މި 12 ރަށުގައި ޕާކު ތަރައްޤީކުރުމުގެ  އެއްބަސްވުމުގައި ސޮއިކުރުމުގެ ރަސްމިއްޔާތު އޮތީ މިއަދު ހަވީރު ސްޓެލްކޯގެ 5 ވަނަ ފަންގިފިލާގެ އޮޑިޓޯރިއަމްގައެވެ. 

މި ރަސްމިއްޔާތުގައި ށ. ފީވަކާއި، ނ. ހެނބަދޫއާއި، ނ. މާޅެންދޫއާއި އަދި ނ. ކުޑަފަރީގެ އިތުރުން މ. ވޭވަށާއި، މ. މަޑުއްވަރީގައި ޕާކު ތަރައްޤީކުރުމަށް ސޮއިކުރީ ފެނަކައާއެކުގައެވެ. ށ. ކޮމަންޑޫއާއި، ނ. މަނަދޫއާއި، ނ. ފޮއްދޫއާއި އަދި ފ. ނިލަންދޫގައި ޕާކު ތަރައްޤީކުރުމަށް ސޮއިކުރީ އެމްޓީސީސީއާއެކުގައެވެ. ނ. ކެނދިކުޅުދޫއާއި، ނ. ވެލިދޫގައި ޕާކު ތަރައްޤީކުރުމަށް ސޮއިކުރީ އާރުޑީސީއާއެކުގައެވެ. 

މި އެއްބަސްވުންތަކުގައި މިނިސްޓްރީގެ ފަރާތުން ސޮއިކުރެއްވީ ޕާރމަނަންޓް ސެކްރެޓަރީ ޑރ. ފާޠިމަތު މުނާއެވެ. ފެނަކާގެ ފަރާތުން ސޮއިކުރެއްވީ އެ ކުންފުނީ އެމްޑީ  މޭޖަރ ރިޓެއާޑް މުޙައްމަދު ނަޖާޙެވެ. އެމްޓީސީސީން ސޮއިކުރެއްވީ އެ ކުންފުނީގެ އެމްޑީ ޑީސީޕީ ރިޓެއާޑް އަޙްމަދު ސައުދީއެވެ. އާރުޑީސީން ސޮއިކުރެއްވީ އެމްޑީ  ބްރެގޭޑިއަރ ޖެނަރަލް ރިޓެއާޑް ޢަލީ ޒުހައިރެވެ.

ޕާކުތައް ތަރައްޤީކުރުމުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި  ޕާކުތައް ތަރައްޤީ ކުރުމަށް ހަމަޖެހިފައިވާ ރަށްތައް ހިމެނޭ ދާއިރާތަކުގެ ރައްޔިތުންގެ މަޖިލީހުގެ ޢިއްޒަތްތެރި މެންބަރުން ބައިވެރިވެވަޑައިގެންނެވިއެވެ.

މި ރަސްމިއްޔާތުގައި މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވާރކްސް އާދަމް ޝަރީފު ޢުމަރާއި، ސްޓޭޓް މިނިސްޓަރ އަޙްމަދު ރަޝީދު ވާހަކަފުޅުދެއްކެވިއެވެ. މިއަދު ސޮއިކުރެވުނު ކުޑަކުދިންގެ ޕާކުތައް ކުރިއަށް އޮތް 6 މަސްދުވަހުގެ ތެރޭ ނިންމުމަށް ވަނީ ހަމަޖެހިފައެވެ.