news photo

"ބައިނަލްއަޤްވާމީ އުފާވެރިކަމުގެ ދުވަސް" ގިނަ ބަޔަކަށް އުފާވެރިކަން ގެނުވައިދޭ ފަދަ ގޮތަކަށް މި މިނިސްޓްރީން ފާހަގަކުރަނީ

19 މާރިޗު 2025

"ބައިނަލްއަޤްވާމީ އުފާވެރިކަމުގެ ދުވަސް" ގިނަ ބަޔަކަށް އުފާވެރިކަން ގެނުވައިދޭ ފަދަ ގޮތަކަށް، މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވާރކްސްއިން ފާހަގަކުރުމުގެ ޙަރަކާތްތައް ފެށުމަށް ތައްޔާރުވެއްޖެ ކަމަށް ޑެޕިޔުޓީ މިނިސްޓަރ އާމިނަތު ނަމްޒާ ވިދާޅުވެއްޖެއެވެ. ބައިނަލްއަޤްވާމީ އުފާވެރިކަމުގެ ދުވަހަކީ މާރިޗު މަހުގެ 20 ވަނަ ދުވަހެވެ.   

"ބައިނަލްއަޤްވާމީ އުފާވެރިކަމުގެ ދުވަސް" ފާހަގަކުރުމަށް މިއަދާއި، މާދަމާ މާލޭގައި ކުރިއަށް ގެންދިޔުމަށް ހަމަޖެހިފައިވާ ޙަރަކާތްތަކުގެ ތެރޭގައި، ގިފްޓް ޕެކް ޙަވާލުކުރުމާއި، ދުވަހާ ގުޅޭ ކާޑު ބެހުމާއި، މާ ހަދިޔާކުރުމާއި، ދުވަހުގެ ތަހުނިޔާ ފޮނުވުމާއި، އަދި ޓީވީއެމުން މިހާރު ލޯންޗްކޮށްފައިވާ "ހިތްހެޔޮކަމުން އުފާވެރިކަން" މި ކެމްޕޭނުގެ ދަށުން ހިތްހެޔޮކަމާއި، އޯގާތެރިކަމުން އުފާވެރިކަން ގެނުވައިދޭ ފަދަ ވީޑިޔޯ  ފޮނުވުމުގެ ޙަރަކާތެއް ކުރިއަށް ގެންދާ ގޮތަށް ހަމަޖެހިފައިވާ ކަމަށް ޑެޕިޔުޓީ މިނިސްޓަރ ނަމްޒާ ވިދާޅުވިއެވެ. 

މި އަހަރުގެ "ބައިނަލްއަޤްވާމީ އުފާވެރިކަމުގެ ދުވަސް" ފާހަގަ ކުރެވެނީ ހެޕިނަސް އިންޑެކްޝަންގެ ޕާޓްނަރުން ކަމުގައިވާ ޕީއެސްއެމާއި، ދިރާގުގެ އިތުރުން މޯލްޑިވްސް ޕޮލިހާއި، އުރީދޫ މޯލްޑިވްސްއާއި، ވީބީ މާރޓް އަދި ހެޔޮއެދޭ ބައެއް ފަރާތްތަކުގެ އެހީތެރިކަމާއެކުގައެވެ. 

މި ދުވަހުގެ ޙަރަކާތްތަކުގައި ބައިވެރިވުމުގެ ގޮތުން ފަރުދީ ފެންވަރުގައާއި، މުއައްސަސާތަކުގެ ފެންވަރުގައާއި، މުޖުތަމަޢުގެ ފެންވަރުގައި އަނެކުންނަށް އެހީތެރިވެ، އޯގާތެރިވުމުގެ ގޮތުން ކޮންމެވެސް ކަމެއް ކޮށްލަ ދެއްވުމަކީ މި ދުވަސް، ބައިނަލްއަޤްވާމީ ފެންވަރުގައި ފާހަގަކުރުމުގެ އެންމެ މަތިވެރި އެއް މަޤްޞަދެވެ.