ޢީދު އަލިން މުޅި ރާއްޖެ ދިއްލުމަށް ވަމުންދާ ތައްޔާރީތައް މިނިސްޓަރ އާދަމް ޝަރީފު ޢުމަރު ބައްލަވައިލައްވައިފިއެވެ. އެ ގޮތުން ރޭ އެ މަނިކުފާނު ވަނީ ޢީދު ލައިޓްތަކުގެ ސައުންޑް ސެޓްއަޕް ތައްޔާރުކުރުމަށް ސްޓެލްކޯގައި މިނިސްޓްރީގެ މުވައްޒަފުންނާއި، ސްޓެލްކޯގެ މުވައްޒަފުން ކުރިއަށް ގެންދާ މަސައްކަތްތައް ބައްލަވައިލައްވައިފައެވެ. 

މީގެ އިތުރުން މާލެ ސިޓީގައި ޢީދު ލައިޓްތައް ހަރުކުރުމަށް ކުރަމުންދާ މަސައްކަތް، އެކި ސަރަޙައްދުތަކަށް ވަޑައިގަތުމަށް ފަހު މިނިސްޓަރ އާދަމް ޝަރީފު ޢުމަރު ވަނީ ބައްލަވައިލައްވައި މަސައްކަތުގައި ޙަރަކާތްތެރިވަމުން އަންނަ ފަރާތްތަކަށް ހިތްވަރުދެއްވައިފައެވެ. 

އެނގިވަޑައިގަންނަވާނެ ފަދައިން ޢީދު ދިއްލުމަކީ ކުޑަކުދިންނަށާއި، ޒުވާނުންނަށް އަދި ޢުމުރުން ދުވަސްވީ މީހުންނަށް ވެސް ޚާއްޞަ އުފަލެއް ލިބިގެންދާ މުހިންމު ޙަރަކާތެކެވެ. މި އަހަރު ޢީދު އަލިން ރާއްޖޭގެ 64 ރަށް އެއްފަހަރާ މި މަހުގެ 29 ވަނަ ދުވަހުގެ ރޭ ދިއްލައިލުމަށް ވަނީ ހަމަޖެހިފައެވެ. 

މި އަހަރު "ޢީދު އަލި" ދިއްލުމުގެ ބޮޑު އިވެންޓް ބޭއްވުމަށް ހަމަޖެހިފައި ވަނީ މި މަހުގެ 29 ވަނަ ދުވަހުގެ ރޭ ހުޅުމާލޭ ސެންޓްރަލް ޕާކުގައެވެ. މި އިވެންޓްގައި ޢިއްޒަތްތެރި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ބައިވެރިވެވަޑައިގަންނަވައި ގޮތަށް ވަނީ ހަމަޖެހިފައެވެ.